Aħna Radju Marija
Il-Missjoni Tagħna
Il-Missjoni ta’ Radju Marija Malta hija li jkun leħen nisrani f’kull dar f’Malta u Għawdex u lil hinn. Radju Marija Malta jagħmel parti mill-Familja Dinjija ta’ Radju Marija. Mhuwiex Radju tal-Knisja imma għall-Knisja. It-temi ewlenin tal-programmazzjoni huma l-Liturġija tas-Sigħat, il-Quddiesa, ir-Rużarju Mqaddes u talb devozzjonali ieħor. Radju Marija jwassal ukoll katekeżi u jittratta temi li jvarjaw mill-professjoni tal-fidi, kwistjonijiet soċjali, programmi ta’ żvilupp uman u soċjali, kif ukoll aħbarijiet mill-Knisja u s-soċjetà. Radju Marija ma jxandarx riklami kummerċjali. Il-ħidma kollha tar-Radju u t-tixrid tiegħu hija afdata lill-Providenza Divina.
L-Istorja Tagħna
Radju Marija Malta beda jxandar uffiċjalment fil-31 ta’ Mejju 1995, minn żewġt ikmamar ċkejkna fil-Kunvent tal-Patrijiet Dumnikani r-Rabat. Dak iż-żmien kien radju lokali bl-isem Radio 106 u kien jittrażmetti fuq frekwenza komunitarja. Fil-5 ta’ Meju 1998, Radio 106 ingħaqad mal-World Family of Radio Maria u hekk sar Radju Marija Malta. Huwa l-ħames pajjiż li beda jxandar bħala Radju Marija. Ftit wara twaqqfet l-Assoċjazzjoni Radju Marija Malta (ARM) u minn dakinhar Radju Marija Malta kompla jikber. Wara ħafna taħbit, fis-17 ta’ Ġunju 2004, Radju Marija beda jittrażmetti fuq il-frekwenza 102.3 FM bl-liċenzja nazzjonali u għalhekk Radju Marija issa seta’ jilħaq lil Malta u Għawdex.
Maż-żmien inħass il-bżonn ta’ sede akbar u li tixraq aħjar għax-xandir tal-Kelma t’Alla. Wara xhur ta’ tiftix u b’ġenerożità kbira tas-semmiegħa nxtrat dar fi Triq San Vinċenz Ferreri fir-Rabat li kellha tilqa’ fiha l-istudjos il-ġodda ta’ Radju Marija.
Mons Arċisqof Charles J. Scicluna bierek u inawgura d-dar il-ġdida ta’ Radju Marija fil-31 ta’ Mejju 2019 fil-preżenza tad-Direttur Fr Antoine Borg, il-President tal-ARM is-Sinjura Yvonne Chircop, l-impjegati u l-voluntiera u rappreżentanti mill-World Family of Radio Maria.
Radju Marija Malta jifforma parti mill-World Family of Radio Maria (WFRM) li hija mifruxa f’aktar minn 80 pajjiż madwar il-kontinenti kollha. L-għan ta’ Radju Marija madwar id-dinja huwa li nippromwovu l-messaġġ ta’ ferħ u tama tal-Evanġelju permezz tal-Kelma ta’ Alla u biex ngħinu nifhmu aktar it-twemmin u t-tagħlim Kristjan.
Radju Marija huwa mmexxi mill-Assoċjazzjoni Radju Marija ffurmata minn voluntiera li għandhom għal qalbhom ir-Radju. Minn dawn kull tliet snin jinħatar Bord Direttiv li minnu jiġi elett President. Bħalissa Radju Marija Malta għandu 9 impjegati fil-qasam tekniku u amministrattiv u mijiet ta’ voluntiera li jgħinu fil-produzzjoni u l-preżentazzjoni tal-programmi, fit-tqassim tal-fuljetti, fl-amministrazzjoni tar-reception u fil-promozzjoni. Katina ta’ persuni li jaraw li Radju Marija jxandar programmi 24 siegħa kuljum biex ikomplu jkun leħen nisrani fid-djar ta’ dawk kollha li jilqgħuh.
Radju Marija huwa miraklu ħaj! Radju Marija ma jxandarx reklami kummerċjali u jiddependi biss mid-donazzjonijiet li jibagħtu s-semmiegħa u fuq kollox mill-Providenza Divina. Radju Marija huwa kkonsagrat lil Ommna Marija, kewkba tal-Evanġelizzazzjoni li ddawwal il-passi ta’ kull min għandu sehem mit-teħid tad-deċiżjonijiet u t-tmexxija f’dan il-proġett hekk sabiħ. Aħna nemmnu bis-sħiħ fil-proġett u l-missjoni tal-evanġelizzazjoni għaliex jeħtieġ li nkomplu nwasslu l-Kelma t’Alla, it-Tagħlim tal-Knisja Kattolika u nkabbru l-imħabba lejn ommna Marija li żgur tfawwar lis-semmiegħa u lilna b’ħafna barkiet.
L-Assoċjazzjoni Radju Marija Malta
L-Assoċjazzjoni Radju Marija Malta jew ARM fil-qasir hija moviment organizzattiv indipendenti minn partiti politiċi, awtoritajiet ċivili u minn istituzzjonijiet governattivi jew kummerċjali. Hija organizzazzjoni kompletament volontarja, awtonoma u ma taħdimx għal profitt. L-ARM hija magħmula minn grupp ta’ voluntiera li għandhom għal qalbhom lil Radju Marija u tfittex li tara li l-ħidma tar-Radju titwettaq bl-aħjar mod għat-tixrid tal-Kelma t’Alla u tat-Tagħlim tal-Knisja taħt il-ħarsien ta’ Ommna Marija. L-ARM jiltaqa’ mill-inqas darba f’sena u kull tliet snin jinħatar Bord Direttiv li jkollu f’idejh it-tmexxija tar-Radju. Mill-Bord Direttiv jinħatar President li flimkien mad-Direttur tar-Radju jkun il-mutur u t-tmun tar-Radju f’konformità ma’ dak li titlob il-World Family of Radio Maria. Il-Bord Direttiv jiltaqa’ mill-inqas darba f’xahar jew aktar skont l-eżiġenzi tal-istazzjon u jiddiskuti l-andament tar-Radju u kif Radju Marija jista’ dejjem jilħaq aktar djar u semmiegħa. Il-membri kollha fl-ARM huma voluntiera u ma jirċievu l-ebda ħlas għall-ħidma tagħhom.
It-Tim ta' Radju Marija
Bridget Micallef
President Assoċjazzjoni Radju Marija Malta (Voluntiera)
Fr Antoine Borg
Direttur Editorjali
Albert Brincat
Koordinatur Editorjali
Joan Sammut
Koordinatur Editorjali
Marvin Mansueto
Koordinatur tal-Istazzjon
Saviour Chircop
Uffiċjal Tekniku Għoli
Emilio Farrugia
Uffiċjal Tekniku
Moira Bugeja
Koordinatriċi Reception